Jerusalem-a inkahna thlengah police pahnih an thi

Jerusalem-a hmun thianghlim bulah nimin khan mi pathumin silai an hmetpuak a, Israel police officer pahnih an thi. Pawikhawihtute hi Israel police-te’n an kaphlum nghal a ni.

Pawikhawihna thlenna hmun hi Muslim leh Juda-te hmun pawimawh a ni a, Muslim hoin Nobel Sanctuary tiin an vuah a, Juda hoin Temple Mount an ti thung. Nitinin tlawhtu khualzin eng emaw zat an awm ṭhin a ni.

Mi pathum silai kengte chuan nimin khan he hmun pawimawh hi tlawhin, Old City gate bula an kal laiin police te hi an hmu a, an kap ta mai niin police thupuangtu Luba Simri chuan a sawi. Hemi hnu hian Temple Mount-a mosque pakhat lam panin an tlanchhe zui a, police-te hian um zuiin firfiak pathumte hi an kaphlum ta a ni.

Kum 2015 aṭang khan Palestinian-te chuan kawt­thlerah Israel mite an bei fo a, pawikhawihna thlengtu zinga mi Palestinian mi 255 leh Jordan mi pakhat chu kahhlum an ni tawh. Israel mi 38, US mi khualzin pahnih leh British zirlai pakhat chu Palestinian miten an beihnaah an lo thi tawh bawk a ni.