UN palaiin a ṭum khatna atan Myanmar a tlawh

United Nations special envoy to Myanmar, Noeleen Heyzer chuan Thawhlehni khan Myanmar a thleng. Nikum October thlaa UN palai atana ruat a nih hnua Myanmar a tlawh ṭum khatna a ni.

Singaporean sociologist Heyzer hi UN secretary-general Antonio Guterres chuan nikum khan Myanmar special envoy atan hian a ruat a, Swiss mi Christine Schraner Burgener a thlak a ni.

Heyzer-i'n a thlak tak, Christine Schraner Burgener hian palai hna a chelh lai hian Myanmar ram tlawh a tum chu Myanmar sipai hotute hian an lo dang zel a ni. Nikum December thla khan Myanmar-a a office pawh sipaiten an kharsak a, he rama a hnathawh pawh a tawp tih a sawi a ni. Amah thlaktu Heyzer hi office hawn an phalsak dawn em tih state media lam pawhin an la sawichiang ngam lo.

Myanmar sipaiten civil sorkar thuneihna hnehchhuh a, ro an rel hnuah Myanmar tualchhung buaina hian ziaawm lam a la pan thei lo. UN leh ASEAN-in remna siam tura palai hna an thawh pawhin awmzia a nei tlem hle a, sipai hotute hian eptute nena inbiakna neih an duh lo a ni.

Heyzer hian tualchhung buaina thleng mek chungchanga hmalak dan tur leh an ram inenkawlna tura a ngaihpawimawhna lai hmunte a puangchhuak dawn tih UN thupuangtu Stephane Dujarric chuan a sawi. Heyzer hian Myanmar-a sipai sorkar emaw hruaitu hlui Aung San Suu Kyi emaw a hmu dawn em tih a tarlang tel lo.