UN hotuin Ukraine a tlawh dawn

United Nations secretary-general Antonio Guterres chuan kumin February 24 aṭanga Russia nena indo tawh, Ukraine ram a tlawh dawn tih UN thupuangtu chuan a sawi. Ukraine a cham chhung hian, Guterres chuan an president Volodymyr Zelenskyy leh Turkey president Tayyip Erdogan-te a hmu ang.

Indona thleng mek avanga Ukraine-in grain thawnchhuah a tihtawp hnuah, UN hmalaknaa inbiakremna neih a nih hnuah a thawnchhuak leh tawh a, UN hotu pawh hian naktukah an thawnchhuahna hmun, Odesa-a Black Sea port a tlawh nghal dawn a ni.

Guterres hian Ukraine khawthlang lam, Lviv khuaah President Zelenskyy chu a hmu dawn a, Zaporizhzhia nuclear power plant dinhmun pawh an sawidun tur zingah a tel. Russia nena inremna siam dan tur pawh an ngaihtuah ngei rin a ni bawk.

Hetih lai hian Russia-in a luah, Crimea bialah Thawhlehnia military base-a bomb puak chungchangah Russia chuan Ukraine chu mawhphurtuah a puh. Crimea hi Russia-in mamawh a chawkluhna kawng pawimawh tak a ni.

Thawhlehni khan Crimea hmarlama military base-a ammunition dahna hmun chu puakin a kang zui a, rel service a tihbuai bakah military base chhehvela awm mi 2,000 vel chu sawnchhuah an ni bawk.

Russia defence ministry chuan Thawhlehnia ammunition depot-a thil tihpuah chu an hlawhtlinna neih tihchhiat tumna ngei a ni tiin a puh. Russia hian kum 2014 khan Crimean peninsula hi a lo luahsak tawh a ni.

Ukraine lam chuan he thil thleng chungchangah hian sawi engmah a la nei lo thung.