NKorea-in cruise missile pahnih kapchhuak

North Korea chuan an ram khawthlang lam, Onchon tuipui kam aṭangin nimin zing khan cruise missile pahnih a kapchhuak leh niin South Korea military chuan a sawi. Mahse missile a kahchhuah hi eng ang nge a nih tih erawh a sawilang lo.

NKorea hian tunhnai khan missile vawi enge maw zat a lo enchhin tawh a, nimina an kahchhuah hi kumina ṭum 18 an kahchhuahna a ni. June 5 khan short-range ballistic missile pariat an kapchhuak a ni.

Hetih lai hian South Korea leh United States chuan ni li awh tur preliminary joint drill chu Thawhlehni aṭang khan an nei ṭan. Hei hi August 22-September 1 inkar live field training Ulchi Freedom Shield neih tura tana an lo inbuatsaih lawkna a ni. NKorea chuan he drill neih a ni hi a lawm lo hle a, an ram runna tur an enchhinna angah a ngai a ni.

South Korea president Yoon Suk-yeol chuan nimin vek khan, an ṭhenawm NKorea-in nuclear weapon an siam ṭhinte chawlh san a, nuclear ralthuam paihbo tura an intiam thei a nih chuan economy lama ṭanpuina pek a tiam tih a sawi.