SKorea-in North nena inbiakna neih a rawt
South Korea President Moon Jae-in chuan ramri chungchanga North Korea nena an boruak ṭha lo neihte chingfel a, kum 1950-a Korean War avanga chhungkaw in-
ṭhendarhte inhmuhkhawmna hun siamsak lehna tura inbiakna a duh thu a sawi.
South Korea Vice Defence Minister Suh Choo-suk chuan July 21 hian Tongilgak-ah military talkh neih an duh thu North lam hi an hrilh niin a sawi. Tongilgak hi inter-Korea talk lo neih tawhna, ramri bula Panmunjom khuaa North Korean building a ni. Kum 2015 December thla khan government level talk neih a lo ni tawh a ni.
President Moon chuan North Korea nuclear leh missile programme kalpui mek titawp tura nawr a pawimawh thu leh, inbiakna neihpui chu thil ṭul tak niin a lo sawi tawh a ni. Moon hian Korea ramri-a ram pahnih sipaite inep leh intihelna thleng ṭhin chu tihtawp a ṭul thu a lo sawi tawh bawk.
Seoul Red Cross chuan ramri bul khuaah hian Korean War avanga chhungkaw inṭhendarhte inhmuhkhawm lehna hun buatsaih tur chungchangah August 1 hian a hrana inbiakna neih an duh thu an sawi bawk. Chhungkaw inhmuhkhawm hun hi Chuseok holiday, October thla hian neih theih beisei a ni.
North Korea chuan SKorea rawtna siam chungchang hi a la chhang lo. NKorea hian nikuma South lama tlanchhia, NKorea waitress 12-te chu a thawn kir leh hma loh chuan South nen hian eng kawng maha inbiakna neih a duh loh thu a lo sawi fo tawh a ni. North Korea waitress 12 leh restaurant manager-te chu South lam hian an ruchhuak niin a puh a, mahse South lam chuan heng mite hian an mahni duhthu ngeiin North hi an chhuahsan niin a sawi thung.