Israel-in security bill pawm
Israel Parliament commitee chuan Pathianni khan Jerusalem pum a thunun theihna tur security bill a pawm. Bill pawm a nih tak avang hian Palestinian kutah Jerusalem hmun ṭhenkhat pek a harsat phah sawt dawn a ni. Bill hi far-right Jewish Home leader Shuli Moalem-Refaeli-a’n a pu lut a, Ministerial Committee for Legisation chuan a pawm a ni. He bill hnuaiah hian Jerusalem-a Israel thuneihna chin chu midang kuta pek a nih dawn chuan Knesset member hmun li-a ṭhena hmun thum, member 80 talin an pawmpui a ngai dawn a ni.
Committee-in bill a pawm hi Basic Law siamṭhatna tur a ni a, Basic Law hnuaiah hian khawpui huam chhunga khawi hmun pawh midang kuta pek a nih dawn chuan parliament member 61 pawmpuina neih a ngai a ni. Mahse bill siamṭhatah chuan he dan hi tihkhauh sawt a ni a, member 80 talin an remtihpui a ngai tawh ang.
He bill hi Prime Minister Benjamin Netanyahu leh a kaihhruai ṭangrual sorkar chuan a thlawp a, Parliament-ah pawh a tlang ngei rin a ni.
Israel hian 1967 Middle East War lai khan East Jerusalem hi a la a, West Bank leh Gaza Strip nen a luah zui a ni. East Jerusalem chu an khawpui peng pakhat, lakhran theih loh niin a puang zui bawk. Hetih lai hian Palestinian-te chuan Palestinian ram hran a din hunah East Jerusalem chu an khawpui tur tih an sawi thung.