NATO-in Turkey leh Germany buaina chingfel turin ngen
NATO Secretary General Jens Stoltenberg chuan Turkey leh Germany foreign minister-te chu Turkey air base chungchanga an inkara inhriatthiam lohna awmte chingfel turin a ngen.
Nikuma Turkey sorkar paihthlak tuma beihnaa inhnamhnawiha puh, Germany-a tlanchhiate chu Turkey hian an rama thawn kir turin a ngen a, mahse Germany hian a thawn kir duh lo a, Turkey rama Turkish-German journalist tang mek chu chhuah turin a phut thung.
An inkara inhriatthiam lohna awm avang hian Germany roreltuten Turkey air base tlawh an tum pawh Turkey sorkar hian a remti lo a ni. Turkey khawpui, Ankara chhim lam km 250-a hla, Konya-a NATO air surveillance mission-ah Germany sipaite an tel a ni. Incirlik-a air base danga Germany sipai awmte chu Jordan-ah sawn an ni tawh bawk. NATO thupuangtu chuan Germany leh Turkey hian an inkar buaina hi an chinfel ngei an beisei thu an sawi.