UN palaiin mi tihlum tawh lo turin Myanmar sipai hotu a ngen
United Nations special envoy to Myanmar, Noeleen Heyzer chuan Nilainia Myanmar sipai hotu lu ber, general Min Aung Hliang nen an inkawmnaah sipaite chu an mi tangte tihlum tawh lo turin a ngen.
Nikum October thlaa UN palai atana ruat a nih hnuah Heyzer hian a ṭum khatna atan Myanmar hi a tlawh a ni. Myanmar sipai hotu nen an inkawmnaah hian an ramchhunga buaina thleng mekte titawp tur leh, politics thil vanga mante pawh chhuah vek turin a ngen bawk. Chhuah zalen tura a ngen zingah hian Myanmar hruaitu hlui Aung San Suu Kyi adviser, Australian economist Sean Turnell pawh a tel.
UN deputy spokesperson Farhan Haq chuan Heyzer-i'n Aung San Suu Kyi hmuh a dilna chu sipaite hian an hnawlsak thu a sawi. Hemi rual hian Heyzer leh sipai hotu hian inbiakna ṭha tak an nei thei a, UN chuan an ngenna chu Myanmar sipaite hian an zawm dawn em tih an thlithlai reng dawn tih a sawi.
Myanmar-in Russia oil lalut dawn
Myanmar-a sipai kaihhruai sorkar chuan khawvelin energy lama buaina an tawh mek karah, an ram pawhin supply indaih lohna leh thil man sang zel chhawk zangkhaina turin Russia aṭangin gasoline leh fuel oil an lalut dawn tih a sawi.
Myanmar ram hian Russia nen thawhdunna thuk tak an nei a, ram pahnihte hian khawthlang ramte hrekna pawh an la tawk dun mek bawk.
Russia hian Ukraine a run avanga energy an thawnchhuahna pui ber, Europe-in kumin kumtawp aṭangin oil-a an insumdawn tawnna te an tihtawp dawn avangin energy leitu tur dang a zawng mek a ni.
"Russia aṭangin petrol lakluh phalna kan nei tawh a ni," tiin a quality ṭhat leh man tlawmna avangin an duhsak tih sipai thupuangtu Zaw Min Tun chuan Nilainia news conference an neihnaah a sawi.
Media tarlan danin, September thla aṭang hian fuel hi thawnluh ṭan theih beisei a ni. Nikum February thlaa sipaiten thuneihna an chan aṭang khan petrol man hi 350%, litre khatah kyat 2,300-2,700 in a sang tawh a ni. Kar liam ta aṭang khan, ram chhung hmun ṭhenkhata petrol station-te chu indaih lohna avangin khar an ni tawh tih media report chuan a tarlang.
Russia hi Myanmar-in sipai ralthuam a lakluhna pui ber a ni bawk.
