China-in Russia-ah a sipaite a tir dawn

China chuan tun thla tawpa Russia rama Vostok-2022 military exercise neih turah a sipaite a tir dawn tih a sawi.

China leh Russia military-in kumtina thawhdunna tur kawng an lo siam tawh angin, Chinese People's Liberation Army (PLA) chuan Russia-a military exercise-ah hian sipai an tirh tur thu Chinese Defence Ministry thuchhuah chuan a tarlang.

He hunah hian Belarus, Tajikistan, Mongolia bakah ram dang pawhin sipai an tir dawn a, India sipaite pawh tirh an ni dawn tih sawi ni mah se,Indian Army emaw Ministry of Defence emaw chuan thuchhuah engmah an la nei lo thung.

Vostok-2022 exercise hi August 30-September 5 inkara neih tur a nih thu Russia sorkar news agency chuan a sawi. He exercise hi chief of Russia General Staff, Valery Gerasimov kaihhruaina hnuaiah, Eastern Military District-a training ground 13-ah neih a ni ang.