Kabul mosque-a bomb puakah mi 3 an thi

Afghanistan khawpui, Kabul-a mosque-ah Ningani khan tlai ṭawngṭaina hun an hman laiin bomb a puak a, mi pathum an thi a, mi dang ṭhahnem takin hliam an tuar bawk tih police leh damdawi-in official-te chuan an sawi.

Italian non-govern­mental organization (NGO) Emergency enkawl damdawi-in chuan hliam tuar 27 an enkawl thu leh, an zingah hian naupang panga an tel thu a sawi. Hliam an enkawl zinga pathum an thi bawk a ni.

Hetih lai hian security official chuan bomb puak vanga thi hi mi 20 an tling a, hliam 40 an awm niin a sawi thung.

Taliban sorkara thupuangtu, Zabihullah Mujahid chuan thi hi pathum niin a sawi, hliam tuar zat erawh a sawilang lo. Pawikhawihtute chu hrem ngei an ni dawn tih a sawi bawk.

Kabul Police thupuangtu Khalid Zadran pawhin mosque chhunga bomb puakah hian thi leh hliam eng emaw zat an awm tih a sawi a, mahse a zat erawh hriatchian a la ni lo tih a sawi.

Pawikhawihna thlenna hmuna awmte chuan Kabul hmarlam, Khair Khanna-a Siddiquiya mosque-a bomb puak hian a chhehvel building tukverhte pawh a nghawr keh niin an sawi. Intelligence team pawhin bomb puahna hmun hi tlawh nghalin, an chhui zui mek a ni.

Taliban hian Afghanistan-a thuneihna an chan hnuah ram chhunga venhimna chu ṭha taka vawnhim an tiam a, mahse tun hnaiah an ram chhungah hian firfiak pawlte pawkhawihna a thleng ngun hle.

Kar hmasa khan, Taliban sakhaw mi challang tak Sheikh Rahimullah Haqqani chu Kabul-a sakhaw thurin zirna an neihna hmunah bomb tihpuah a nih avangin a thi a, ISIL (ISIS) chuan pawikhawihna hi an tih a nih thu an puang zui bawk.