Kim Jong-UN farnu-in SKorea President ngawi turin a hrilh

North Korea hotu Kim Jong Un-a farnu, Kim Yo Jong chuan nimin khan South Korea president Yoon Suk-yeol-an NKorea-in nuclear ralthuam an tihbo chuan an ramin economy lamah puih a tum tia a sawi chu chhang letin, SKorea hotu chu ngawi turin a hrilh.

SKorea President hian he a ruahmanna hi May thla khan a lo sawichhuak tawh a, Nilaini khan President office a luah ni 100 tlinna puala news conference a neihah a sawi nawn leh a ni.

Hemi hnu hian Kim Yo Jong hian thuchhuah siam ve nghalin, "Thu ṭha leh awmze nei lo sawi ai chuan a ka hup se a inti bawrhbang lo zawk tur, " tiin SKorea President thusawi chu a chhang. North Korea zahawmna leh a nuclear ralthuamte chu economy lama thawhdunna tura thleng theih mai nia President Yoon-a'n a ngai chu a naupanchhiat thlak hle a ni, a ti bawk.

South Korea Unification Minister, NKorea nena an inkungkaihna buaipuitu chuan Kim-i ṭawngkam chu mi zah pah lo leh mawi lo a tih thu a sawi zui ve leh nghal bawk a ni.

Nilaini khan U.S. State Department thupuangtu chuan Yoon-a policy chu an thlawp thu a sawi rualin, hei pawh hi Kim-i chuan chhangin,US leh SKorea-in joint military drill an neih mek chuan inremna siam chungchang an sawite an lak thutak tawk loh zia a tilang a ni, a ti. "Hmai chhana inbiakna kan neihpui dawn lo tih kan tichiang duh a ni," tiin President Yoon chungchang chu a sawi zui.

Kim Yo Jong hian tunhnai chho aṭang khan an ṭhenawm ram hi a sawisel fo tawh a ni.

Zirtawpnia thuchhuah a siam hi Yoon-a beih nat ber ṭum tia sawi theih a nih rualin, tun thla tir lam khan an rama Covid-19 hri len chhanah South Korea hi a lo puh tawh bawk.