Myanmar sipai hotuin Suu Kyi nena inbe turin Sipai sorkar a inhawng tih a sawi

Myanmar sipai sorkara hotu lu ber, General Min Aung Hlaing chuan ramchhung buaina thleng mek tihtawp a nih theihna turin civil sorkar hotu paihthlak tak, Aung San Suu Kyi chu a thubuai neih mekte chinfel a nih hnuah inbiakna neihpui turin sipai sorkar chu a inhawng tih a sawi.

Min Aung Hlaing chuan thuchhuah siamin, "A thubuaite dan anga hmalak fel a nih hunah, min chhan dan azirin inbiakna neih chungchang hi kan ngaihtuah ang," a ti.

Kum 77 mi, Suu Kyi-i kaihhruai civil sorkar thuneihna chu nikum February 1 khan sipaiten an hnehchhuah a, Suu Kyi hi pawn chhuak thei loa hren nghal niin, thubuai eng emaw zat siamsak a ni tawh. A thubuai neihahte hian thiam loh chantir a nih zel chuan kum tam tak lung-in tantir theih a ni ang.

Suu Kyi thubuai ngaihtuahnaah jounalist-te kal khap a ni a, a lawyer-te pawh media-te hmachhawn an khap bawk. Sipai sorkar chuan a thubuai hi ngaihtuah zawh hun tur hi an la sawilang lo.

July thla khan sipai thupuangtu chuan tualchhunga buaina tireh turin sipai sorkar leh Suu Kyi inkarah inbiakna neih a nih mai theih thu a lo sawilang tawh a, "Suu Kyi nena inbiakna hi thil thleng thei lo a ni lo," tiin Zaw Min Tun chuan a sawi a ni.