Pakistan PM hlui Imran Khan thusawi live-a tihchhuah khap

Pakistan media watchdog, Pakistan Electronic Media Regulatory Authority (PEMRA) chuan an ram prime minister hlui Imran Khan thusawi chu satellite television channel zawng zawngah live-a tihchhuah a khap.

Inrinni liam ta khan PM hlui Khan hian Islamabad-a rally neihnaa thu a sawiah state institution leh sorkar official-te a vau a, police official-te, election Commission of Pakistan leh politics lama an khingpuite chu kar hmasaa man, a thawhpui Shahbaz Gill enkawl a nih danah an laka thubuai thehluhah a vau bawk.

Imran Khan-a thusawi hnu lawkah PEMRA chuan thuchhuah siam ve nghalin, PM hlui thusawi chu live-a pechhuak tawh lo turin TV channel-te chu a hriattir. PEMRA chuan,sorkar sawichhiatna lam ṭawngkam dang thei tur, time-delay mechanism hmang tura vawi tam tak warning an pe chungin television channel-te chuan an zawm ṭha lo hle tih a sawi. "Pakistan Tehreek-e-Insaf chairman, Imran Khan hian a thusawinaah finfiahna awm loin sorkar leh a kaihhnawihte chu chhe takin a puh a, inhuatna ṭawngkam chhe tak takte chu state institution leh officer-te lakah a chhak chhuak bawk a, hei hi dan leh thupek bawhchhiatna niin, vantlang himna leh muanna a tichhe bawk a ni," a ti. Khan thusawi hi Article 19 of the Constitution leh media tana code of conduct siam bawhchhiatna a ni, an ti.

PEMRA chuan Khan-a thusawi te hi uluk taka thlitfim anih hnuah chhuah chauh a nih tur thu a sawi.

Inrinni liamtaa rally hi Khan-a kaihhruai Pakistan Tehreek-e-Insaf party-in Gill an thlawpna lantir tur leh prime minister Shehbaz Sharif sorkar dodalna an lantirna atan an kalkhawm a ni.

Rally neih lai hian, Khan chuan Pakistan Army-te chu ze mumal nei loah puhin, a lamṭangte chu rukru rual bul ai chuan an lam ṭang tlat turin a ngen. Khan chuan an ram inrelbawl dan pawh sawiselin, ṭan lam nei leh rilru kawi tiin a sawi.