Russia-in an sipaite tûr hmanga hraiah Ukraine puh

Russia defence ministry chuan Inrinni liam ta khan Ukraine chhim chhak lama Russia thuneihna hnuaia awm, Zaporizhzhia region-a an sipai ṭhenkhatte chu July thla tawp khan Ukraine chuan tûr hmangin an lo hrai niin a sawi.

Ukraine interior ministry adviser chuan Russia sipai ṭhahnem tak chu July 31 khan tura hrai ni ngeia hriat an nih avangin military hospital-ah hruai an ni, a ti. Test aṭanga a lan danin, an taksaah tur hlauhawm tak, botulinum toxin type B an hmuchhuak tih a sawi bawk.

"Zelenskyy kaihhruaina hnuaiah chemical hmanga pawikhawihna a thleng nia Russia-in kan puhnate hi a dikzia lantirna tur, zirchianna mumal tak kan buaipui mek a ni," tiin ministry chuan a sawi a ni.

Sipaite hraina atana an hman nia an sawi, Botulinum toxin type B hi neurotoxin hlauhawm tak, ei tura a kai palha nerve tichhe thei anih rualin natna enkawl damna atan pawhin an hmang bawk.

Russia defence ministry chuan Ukraine thuneihna, Kherson region-a Russia sorkar hruaitu Volodymyr Saldo damloh chungchang pawh an chhui chiang dawn tih a sawi. Kherson khawpuia mayor hlui Saldo hi March thlaa Russia sipaiin an laksak hnuah region hotu atan an dah a, August thla tir khan a dam lo a ni.