Jerusalem-a Temple Mount-ah Security dah duh loin nawrh huaihawt

Jerusalem-a hmun thianghlim, Temple Mount awmna chu kar hmasa khan silai kengten beiin Israel police officer pahnih an kaphlum a, he thil thleng avang hian Israel sorkar chuan he hmunah hian venhimna khauh zawkin a kalpui.

Temple Mount awmna hmun hi Juda leh Muslim tan hmun thianghlim a ni a, Muslim ho chuan Noble Sanctuary tiin he hmunah hian mosque pawimawh al-Aqsa mosque pawh a awm a ni. Kar kalta Zirtawpnia beih a nih hnu khan khar lailawk a ni a, Thawhṭanni aṭang khan mipuite tlawh theih tura hawn leh tawh a ni.

Beih a nih hnuah Israel sorkar chuan a compound-ah venhimna lam thuam chakin, compound pum leh checkpoint-ah CCTV a dah a, gate luhnaah metal detector a dah bawk. Muslim-te chuan hetianga venhimna lam thil dah a ni hi duh loin compound pawn lamah lungawi lohna an lantir a, Thawhṭanni pawh khan compound chhungah Muslim mi tam tak chu an lut duh lo a ni. Compound pawn lamah lungawi lohna lantirin, police-te nen pawh an innawr buai a ni.

Kar kalta Zirtawpni zing khan Pa­lestinian Muslim pathum chuan Temple Mount compound luhna gate bulah hian Israel police duty pahnih an kaphlum a, pawikhawihtute hi Israel police-te chuan a kaphlum ve nghal an ni. An vai hian central Israel-a Arab city, Umm al-Fahm khaw mi an ni. Pawikhawihna a thlen hnu hian Israel sorkar chuan venhimna lam enfiah turin he compound hi a khar nghal a, hei hi km 50 chhunga khar a nih ṭum khatna a ni. He hmun hi Islam ho hmun thianghlim pathumna a ni bawk a, compound enkawltu Muslim sakhaw thuneitu, Waqf chuan sorkarin venhimna a dah dan chu duh loin, mosque-a ṭawngṭai huaihawt pawh an duh lo tih a sawi. He compound hi Wasq hian a enkawl a, Juda-te chu an luh phalsak ni ve mah se an ṭawngṭai erawh phalsak an ni lo.

Al-Asqa mosque awmna hmun, East Jerusalem hi kum 1967 Middle East War laiin Israel hian a la a, West Bank leh Gaza Strip nen a luah zui a ni. Israel chuan East Jerusalem hi a ramah chhiarin, Jerusalem khawpui nena ṭhendarh theih lo niin a sawi.