Turkey sorkarin emergency rule pawtsei

Turkey sorkar chuan an rama emergency rule hman mek chu thla thum dang atan a pawtsei leh.

Nikum July thlaa sipai ṭhenkhatten sorkar paihthlak tuma an beih hnu khan emergency hi puan a ni a, ṭum li an pawhseina a ni tawh.

Sorkar chuan parliament hnenah emergency pawhsei chungchang hi thlenin, President Tayyip Erdogan-a kaihhruai AK Party chuan majority a neih avangin awlsam takin he rawtna hi a tlang a ni.

Nikum July 20-a emergency rule hman a nih aṭang khan, sorkar paihthlak tumnaa inhnamhnawiha puh mi 50,000 chuang man an ni tawh a, sorkar hnathawk 150,000 vel chu ban leh suspend an ni tawh bawk. Deputy Prime Minister Nurettin Canikli chuan sorkar paihthlak tuma beihnaa a bul tumtu ber, US-a inkhuar Fethullah Gulen-a zawmpui leh hnathawkte thenfaina turin emergency rule puan chhunzawm zel chu a la ngai niin a sawi. Sorkar beihna thlawptu la inthup eng emaw zat an la awm a, heng mite dapchhuah hna hi thawh chhunzawm zel a nih thu a sawi bawk.