PA-in Temple Mount-a metal detector dah an duh lo

Palestinian Aurthority Prime Minister Rami Hamdallah chuan Israel sorkarin Temple Mount-a venhimna tihkhauhna kawng khat atana metal detector a dah chu an duh lo tih sawiin, hei hi titawp tura nawr turin khawvel ram dangte a ngen.

Kar kalta Zirtawpni zing khan silai kengten Temple Mount luhna bul gate hi an bei a, Israel police officer an kaphlum a ni. He thil thleng avang hian Israel chuan venhimna lam tikhauhin, Pathianni aṭang khan gate bulah metal detector hi a dah tel a ni.

Temple Mount awmna hi Juda leh Muslim-te hmun thianghlim a ni a, he compound-ah hian Muslim mosque pawimawh, al-Aqsa mosque a awm a, a compound enkawl hna pawh hi Muslim sakhaw thuneitu, Waqf kuta a awm a ni.

Hamadallah chuan Israel sorkarin gate-a metal detector a dah chu he hmun thianglim nihna leh inrelbawlna thlak danglam tumna nia an ngaih thu an sawi a, hemi duh loh hian Thawhlehni khan compound pawn lamah Muslim mi eng emaw zatin lungawi lohna an lo lantir tawh bawk.

Israel Prime Minister Benjamin Netanyahu chuan Temple Mount enkawl dan chu thlak danglam an tum lo tih a sawi a, mahse kar hmasa lam khan ralthuam hmuh a nih avangin he hmun venhimna atan hian metal detector hi dah a ngai a ni, a ti.

Supreme Muslim Council chuan metal detector dah hian Israel-in Temple Mount-a a thuneihna lantir a tumna nia sawiin, hei hi an pawm theih loh thu a sawi.