Anti-terror law hnuaiah Pakistan PM hlui thubuai siamsak

Pakistan police-te chuan an ram prime minister hlui, Imran Khan chu additional sessions judge leh Islamabad Police senior officer-te a vau avangin Anti-Terrorism Act (ATA) hnuaiah thubuai an siamsak.

Thubuai hi Islamabad-a Margalla police station-ah ziahluh a ni. Khan hian nimin khan Islamabad High Court-ah pre-arrest bail a dil nghal a ni.

PM hlui Imran Khan thubuai siamsak a ni tih an hriat hnuah, a party Pakistan Tehreek-e-Insaf (PTI) member-te chu an pungkhawm nghal a, buaina a chhuah venthawn thilah Khan chenna in bulah security tam tham tak dah an ni bawk.

Imran Khan hi house arrest-a hren a ni mai thei nia sawi a ni bawk a, law enforcement agency-te chuan thuneitu sang lam thu an ngaichang mek. Interior ministry chuan Prime Minister Office-ah PTI hotu, Imran Khan man a nih theihna atan phalna a dil tawh nia sawi a ni bawk a ni.

Inrinni liam taa Islamabad-a rally neihnaa a thusawi avangin Pakistan media watchdog chuan TV channel-te chu PM hlui Imran Khan thusawi hi live-a tihchhuah a khapsak tawh bawk. Khan hian thu a sawiah a thawhpui, Shahbaz Gilol man anih chungchangah police official, hmeichhe magistrate, Election Commission of Pakistan leh politics lama a khingpuite laka thubuai thehluhah a vau a ni. Gill hi August 9 khan private TV channel-ah sorkar laka helna lam thu a sawi avangin man a ni a, Khan leh PTI hruaitu dangte chuan a tan-inah Gill hian nghaisak a tawk nasa niin an sawi.