Sri Lanka eptu party-in President hlui chhui chian phut

Sri Lanka-a eptu party lian ber, Samagi Jana Balawegaya (SJB) chuan an ram President hlui, ram danga tlanchhe mek Gotabaya Rajapaksa chu sorkar sum tichingpena puh a nih chungchangah chhui chian an phut tih an sawi nghal.

SJB chuan Rajapaksa hi Sri Lanka khua leh tui dik tak a nih avangin an rama kir leh turin dikna a nei tih an sawi a, mahse a kir leh a nih pawhin sorkar sum a tihchingpen avangin chhui zui nghal a ni tur a ni, an ti.

Party hruaitu Ajit P Perera chuan President hlui a nu leh pa hriatrengna siamna atan sorkar sum tam tham tak hmanga puh a nih thu sawiin, he puhna hi a dik a nih chuan hremna pek ngei a ni tur a ni, tiin a sawi.

SJB hian an ramin sum lama harsatna an tawh hnua India-in puihna tura USD tld 1 loan a pek chu Rajapaksa kaihhruai sorkar hian a tichingpen niin an puh.

Sri Lanka mipuiten Rajapaksa leh a kaihhruai duh lohna lantira nawrh an huaihawt hnuah President hlui hi Maldives-ah a nupui nen an tlanchhia a, heta ṭang hian Singapore-ah a kal leh a ni. Singapore a thlen hnuah President a nihna aṭanga banna hi a thehlut a, a thlaktu atan Ranil Wickremesinghe chu thlan a ni.

Report ṭhenkhat chuan Rajapaksa hian US Green Card a dil maithei niin an tarlang. A nupui, Loma Rajapaksa hi US citizen a nih avangin a dil thei a ni.