Kum 27 tang turin Thailand sipai hotu hrem

Thailand sipai hotu hlui, Lt Gen Manas Kong­paen chu mihring hmanga sumdawnnaa inhnam­hnawih leh, Myanmar leh Bangladesh aṭanga pem lutte hnen aṭanga thamna sum laa puhnaah thiam loh chantir a ni a, kum 27 tang tura hrem a ni.

Mihring hmanga sumdawnga puh mi 103 chungthu chu Thailand court chuan a ngaihtuah a ni. Dik lo taka sumdawnna kalpui chungchangah hian Satun province-a politician lar leh sum­dawng lian, Pajjuban Aungkachotephan chu a bultumtu berah puh a ni a, kum 75 tang tura hrem a ni. Hetianga mihring hmanga sumdawngte hian Bangladesh leh Myanmar aṭanga Rohingya Muslim pem tuma kalte chu ramhnuaiah te lo hrengin, an chhungte hnenah tlanna sumte an phut nia sawi a ni a, an mi hren zinga ṭhenkhat chu sal atan te an hralh nia sawi a ni bawk.