Arab ramten Qatar laka an thil phut siamṭha

Arab ram pali - Saudi Arabia, United Arab Emirates, Bahrain leh Egypt-te chuan Qatar ram laka an thil phutte siamṭhain, thil 13 ni loin paruk zawk tihhlawtling turin an phut tih an sawi.

Qatar ram hi firfiakte thlawp leh sum hmanga pui ṭhinah puhin, Arab ram pali-te hian an inlaichinna an chhu chat a, an inkalpawhnate pawh an khar bawk. Hemi hnu hian Qatar ram nena an inkar boruak siamṭhat a ni leh theih nana inbiakna neih a nih theih nan Qatar ram lakah hian an thil phut an hriattir a ni. A tirah chuan Qatar lakah hian thil phut 13 an nei a, mahse hun an pek chhungin Qatar hian a tihhlawhtling duh lo a, an ram thuneihna leh inrelbawlna khawi thei lam chu eng thil mah a pawm dawn lo tih a sawi a ni.

Hemi hnu hian Arab ram pali-te chuan Qatar laka an thil phut hi siamṭhain, an inkar boruak siamṭhat nan thil paruk tihlawhtling turin an phut leh ta zawk a ni. Saudi permanent representative, Abdullah al-Mouallimi chuan ram pali foreign minister-te chuan Cairo-a meeting an neihah thil phut paruk hi an siam a, he an thil phut thar hi Qatar tan pawha pawm awlsam tak tur a ni, a ti.

UAE Ambassador Lana Nusseibeh chuan Qatar chuan an thil phutte chu a pawm lo a nih chuan, Saudi Arabia, UAE leh Bahrain-te nena Gulf Cooperation Council-a a awm zui zel pawh a harsat phah dawn niin a sawi.