Donald Trump-a fapa leh thawhpuite Senate-in thu zawtfiah dawn
US President Donald Trump-a fapa upa ber, Donald Trump Jr, a makpa Jared Kusher leh a campaign manager hlui Paul Manafort-te chu kum 2016 President thlannaa Russia inrawlh nia sawi chungchangah Senate committee chuan thu a zawtfiah dawn.
Donald Trump Jr, Jared Kushner leh Paul Manafort-te hi Russia official-te nena inzawmna neiah puh an ni a, mahse an puhna hi President Trump leh a thawhpuite chuan thu dik lo niin an sawi.
Nilaini khan Senate Judiciary Committee chuan Trump Jr leh Manafort-te hi July 26-ah committee hmaa inlan turin a ko a, Kushner chu July 24-ah Intelligence Committee hmaah a inlan thung ang.
An pathum hian nikum khan Russian lawyer meeting an neihpui a, he lawyer hian US president thlannaah Trump-a khingpui, Hillary Clinton-i tihchhiat a lo tiam tawh a ni. Meeting hi nikum June 9 khan New York-a Trump Tower-ah an nei a ni.