Israel police-ten al-Asqa Mosque-ah Muslim mipa kum 50 hnuailam kal khap

Israel police-te chuan nimin khan Muslim mipa kum 50 hnuai lam tan al-Asqa mosque-a kal khapan thupek an tichhuak.

East Jerusalem-a Juda leh Muslim-te hmun thianghlim, al-Asqa awmna hi Juda-te chuan Temple Mount an ti a, Muslim-te chuan Noble Sanctuary an ti thung. He compound chhungah hian Al-Aqsa Mosque bakah Islam ho hmun thianghlim pathumna Dome of the Rock shrine a awm a, Juda-te tan Bible-a lang Juda temple hmun hluite a awm bawk a ni.

He compound hi kar hmasa khan beih tum a ni a, hei vang hian Israel chuan venhimna khauh zawk a dah a, compound luhna gate-ah pawh metal detector dah tel a ni. Hei hi Muslim-te chuan an duh lo hle a, compound pawn lamah lungawi lohna pawh an lo lantir tawh a ni. Palestinian-te chuan nimin khan mosque-a ṭawngṭai rualna hun an hman hmain security dahbelh chungchangah lungawi lohna hi lantir leh an tum a, buaina nasa zawk a chhuah venthawn thilah Israel police-te chuan ṭhalai zawkte kal hi an khap ta a ni. Police-te chuan thuchhuah siamin, nimin atang khan al-Aqsa mosque-ah hian mipa kum 50 leh a chunglam chin chauh kal phalsak an ni thu an sawi a, hmeichhia erawh kal phalsak vek an ni thung.

Zing aṭangin police 3,000 vel duty-tir an ni. Israel security cabinet chuan metal detector lakthlak a nih hun tur chungchang chu police-te kutah dah a nih thu a sawi.

Kar kalta Zirtawpni-a Temple Mount compound luhna gate bula Israel police officer duty chu Palestinian mi pathumin an bei a, police officer pahnih kaphlumin, pawikhawihtute hi Israel police-te’n an kaphlum ve nghal a ni. He thil thlen hnu hian Israel force leh Palestinian inkarah buaina a chhuak zui reng a ni.

Israel-in compound-a venhimna tihkhauhna atana metal detector a dah tel hi Palestinian group Hamas leh Muslim hruaitute chuan na taka sawiselin, nimin khan duh lohna lantira nawrh huaihawt an tum a ni. International Union of Muslim scholar-te chuan Muslim zawng zawngte chu nawrh huaihawt thlawp turin an lo ngen tawh bawk.