Ram 187-ah Covid-19 kai mtd 3.21 chuang awm tawh

Hripui leng mek, Covid-19 chu ram 187-ah mi 32,49,022  in an kai tawh a, he hri vanga thi hi 2,30,804 an awm tawh bawk. 

US chu hri kai leh hri vang thi tamna ber ram a la ni chhunzawm zel. Ningani khan US-ah hri vanga thi hi mi 2,053 awmin, Nilaini khan mi 2,502 leh Thawhlehni khan mi 2,207 in an thihpui bawk. US-a hri kai awm zat hi 10,70,026  an tling tawh a ni. +

Hetih lai hian ram hrang hrangah hri kai, enkawl dam leh damdawiina enkawl kher ngai loa dam hi mi 10,14,000 an awm tawh bawk. US chu hri vanga thi tamna ber ram ni mah se, Covid-19 kai enkawl dam tamna ber ram a ni bawk a, hri kai 10, 70,026 zinga 1,53,947 chu an dam leh tawh a ni. Germany, Spain, China leh Italy-te chu hri kai dam leh tamna ram an ni. 

China ramah chuan hri leng hian ziaawm lam a pan tawh avangin hun rei tak an lo  khar tawh, Beijing-a park, museum leh Forbidden City-te chu nimin aṭang khan hawn ṭan  an ni leh ta. Mahse hri darh tur venna kalpui reng a ni a, Forbidden City pawh ni  khatah mi 5,000 chin bakin an tlawh phal a ni lo. Hri len hma chuan he hmun hi ni khatah mi 80,000 ten an tlawh ṭhin a ni. 

Park-ah pawh ṭum danga tlawh phalsak ṭhin aṭanga 30% chin chauh an kal phalsak a ni bawk. 

Germany pawhin playground, biakin leh cultural institution te hawn a remti. Germany chancellor Angela Merkel chuan state 16 governor-te chu Ningani khan meeting a neihpui a, inkhuahkhirhna kalpui mek thlahdul dan chungchangte an sawiho a ni. He meeting-ah hian infiamna hmun, biakin leh cultural institution-te hawn remti mah se hotel, restaurant leh school-te hawn erawh an la remti lo thung.