Russia-Ukraine war: Kyiv-ah Independence Day lawm khap
Ukraine khawpui Kyiv-ah Soviet rorelna aṭanga zalenna an chan champha lawmna buatsaih khap a ni.
Khawpui chhungah hian vawiina an ram zalenna champha vawi 31-na puala a lawmna buatsaih a, mipui punkhawmna lam buatsaih khap a ni a, hei hi Russia ṭanga beihna dawng mai thei dinhmuna an awm vang tih an sawi. Sipaite pawh missile leh bomb hmanga khawpui beih a nih tur lo chhang let leh lo dang tura inpeih reng tura hriattir an ni.
He khapna thupek hi Ukraine president Volodymyr Zelenskyy-a'n an ram zalenna champha thlen ni hian Russia chuan an ram chungah thil duhawm lo tak a thlen duh mai thei tia a sawi hnuah tihchhuah a ni. Independence Day lawm khapna hian Thawhṭanni aṭanga Ningani thleng a huam ang.
Russia sipaiten Ukraine an beih mekah, Kyiv khawpui hi an bitum ber a ni tawh rih lo a, March thlaa khawpui lak tuma an beihna a hlawhchham hnuah Russia sipaite missile kahchhuah pawhin Kyiv hi a fuh khat hle a ni.
Kyiv bakah an ram hmarchhak lama khawpui, Kharkiv-ah Independence Day lawma tura mipui punkhawm khap a ni bawk. He khawpui hi Russia lam hian long-range artillery leh rocket hmangin an la bei reng a ni. Mayor Ihoar Terekhov chuan Thawhlehni leh Ningani inkar chhung atan tlai dar 4 aṭanga a tuk zing dar 7 thleng curfew a puang zui bawk a ni.
Ukraine chhim lam, Mykolaiv lawngchawlh hmunah pawh regional governor Vitaliy Kim chuan venthawn thilah mipuite chu pungkhawm tam lo turin a ti a, nimin leh vawiin bik atan in lam aṭanga hna thawk turin a ti bawk .
Ukraine chhuahsan turin US-in an mite chah
Kyiv-a US embassy chuan Ukraine Independence Day-ah Russia chuan Ukraine chu nasa zawkin a bei mai thei nia sawiin, Kyiv-a US mi awmte chu an theih chuan a rang lama chhuahsan turin a ti.
"Department of State chuan Russia-in Ukraine-a civil infrastructure leh sorkar thilte tihchhiat vek tumin beihpui thlak an tum tih thu a dawng a ni," tiin embassy chuan an website-ah a tarlang. Hei vang hian a remchan dang anga Ukraine chhuahsan turin US mi leh sate chu a ngen. A hma pawhin US embassy hian security warning hi an mi leh sate tan a lo pe tawh a ni.