Israel-in West Bank-a Palestinian-te tan thlawhtheihna ruahman sak

Israel chuan West Bank-a Palestinian-te chu Negev thlalera airport aṭanga ram danga an zin chhuah theihna turin thlawhtheihna a ruahman sak.

Israel Airports Authority thupuangtu chuan he ruahmanna thar hnuaiah hian Thawhṭanni khan Israel chhim lama resort city, Eilat bula Ramon airport aṭangin Palestinian mi 40 chu ram pawn lamah an thlawk chhuak tih a sawi. Heng mite hi Israel airline, Arkia thlawhtheihna hmangin Larnaca, Cyprus an thleng.

West Bank-a Israel mi chengte chu Tel Aviv-a international airport aṭangin ram dangah zin chhuak thei mah se, Palestinian mite erawh an zinchhuah hi khap a ni. Palestinian-te chuan West Bank aṭangin Jordan an pan phawt a ngai a, Amman airport aṭangin an zin chhuak thei chauh a ni.

Palestinian prime minister Mohammad Shtayyeh chuan Palestinian mite chu West Bank aṭanga km 180 zeta hla, Ramon aṭanga an thlawhchhuah phalsak aiin Jerusalem airport chu hawng leh zawk turin Israel a phut. East Jerusalem-a airport hi Palestinian-te hian 1967 Six-Day War hma zawng khan an hmang ṭhin a, mahse Israel-in an ram a luahsak hnuah kum 2001 aṭang khan airport hi rauhsan a ni. Israel chuan airport awmna hmunah hian Juda mite chenna tur sak tumin ruahmanna a siam a ni.