Kan rama hri leng zual lai a liam tawh : Britain PM

Britain prime minister Boris Johnson chuan an rama Covid-19 hri leng chu a nasat zual hun lai a thleng tawh tih a sawi.

Johnson chuan United Kingdom-a  hri leng vanga  thi pawh an tlem chho tawh tih a sawi bawk. Britain chief scientific adviser Patrick Vallance chuan an ram dam­dawi-ina hri kai vanga lut an tlem thu leh intensive care uint (ICU)-a dahluh an tlem chhoh mek thu a sawi.

UK-ah hian March 23 khan lockdown puan a ni a, lockdown hi hlih a nih dawn chuan thil panga pawimawh tih hmasak tur a awm tih Johnson chuan a sawi. Jonhson chuan a hmasa berah chuan an rama NHS (National Health Service)-te an him tawk em tih chian hmasak a ṭul a, a dawtah chuan he hri vanga thi hi an tlem tial tial a ngaih thu leh hri kai an tlem chhoh a pawimawh thu a sawi. Thil panga zinga pawimawh dang Johnson-a'n a sawi leh chu PPE (Personal Protective Equipment) leh test kit ṭha­hnem tak a awm em tih leh, he hri hi a nasat zual hunlai lo thleng tawh lo turin hma kan la tawk em tih  a ni, a ti. UK-ah hian hri vanga test tawh hi mi 901,905 an awm tling tawh a, tun thla chung hian sorkar chuan mi 100,000 test hman a tum a ni.

UK-a hri kai zawng zawng hi mi 1,71,253 an awm tawh a, chung zinga mi 26,771 te chuan he hri hi an thihpui tawh bawk. University of Oxford chuan UK-based global biopharmaceutical company, AstraZeneca nen 

ṭangkawpin Covid-19 vaccine siamchhuah an tum tih a tarlang.