Hri leng hi China lab aṭanga rawn darhchhuak a ni : Trump

US president Donald Trump chuan Covid-19 hi China-a Wuhan Institute of Virology lab aṭangin a rawn darhchhuak tih a sawi.

Trump chuan heng thute hi sawi mah se engtin nge a rawn darchhuah dan erawh a sawi lang lo thung. White House-ah kumtina May thlaa an hman ṭhin 'Older Americans Month 2020'  hman a ni a, he hun hi kum lama upate puala hman a ni ṭhin.

Kumina kum upate tana hun hman thupui hi 'Make Your Mark' tih a ni a, he hunah Trump chuan China lab aṭanga hri hi a darh thu a sawichhuak a ni. Mahse hri darh chho dan hi kimchang takin a sawi duh lo a, tunah chuan sawichhuah a la hun lo, a ti.

Wuhan Institute of Virology lam hian US puhna hi a pha thung a, mi thiam tak tak chuan Wuhan-a market aṭangin hri hi a darh chho niin an ngai a, ramsa aṭangin mihringah a darh niin an ngai bawk. 

Trump-a'n China lab aṭangin hri hi a rawn darh thu sawi mah se, US secretary of state Mike Pompeo chuan engtia rawn darh nge a hriat loh thu a sawi ve thung. 

Pompeo chuan Wuhan lab aṭang hian a rawn darh em tih chu tuman kan la hre chiang lo a, Wuhan market aṭang hian a rawn darh em tih pawh kan hre bawk hek lo, a ti.