Jerusalem-ah Israel leh Palestinian mite intibuai

Jerusalem-a Juda leh Muslim-te hmun thianghlim, Temple Mount-a buiana kal zelah kar kalta Zirtawpni khan Israel leh Palestinian mite an intibuai a, Israel mi pathum leh Pa­lestinian mi pathum an thi.

Temple Mount-ah hian tun thla ni 14 khan Israel police officer pahnih kahhlum an ni a, pawikhawhtu Palestinian mite chu Israel police-te’n an kaphlum ve nghal a ni. He thil thleng avang hian Israel chuan Temple Mount compound-ah venhimna tikhauhin, compound luhna gate-ah metal detector a dah a, Muslim lam chu an lungawi lo hle a, compound pawn lamah pawh duh lohna an lo lantir tawh a ni. Inrinni khan lungawi lohna lantir lehin, Temple Mount compound pawn lamah Muslim ho pungkhawmin an ṭawngṭai a, hemi hnu hian Israel sipaite leh Palestinian te inkarah buaina a chhuak zui a ni.

Buaina kal zelah Zirtawpni khan Israel-in Palestinian ram a luah, West Bank-a Ramallah bula Juda ho chenna hmuah Israel civil mi pathum vihhlum an ni. Zirtawpni vek khan Halamish-ah Israel civil mi pali chuan beih an tawk bawk a, Israel sipaite chuan pawikhawihtu hi an man niin an sawi.

East Jerusalem leh West Bank-a intihbuainaah hian Palestian mi pathum kahhlum an nih bakah mi tam takin hliam an tuar nia sawi a ni. Buaina chhuah hnu hian Israel chuan West Bank-ah hian sipai tam zawk a tirh luh belh a ni.

Palestinian President Mahmoud Abbas chuan Israel-in an hmun thiang­hlima metal detector an dah aṭang hian, Israel a biakpawhnate a titawp vek tih a sawi. Juda-te’n Temple Mount an tih hi Muslim-te’n Haram al-Sharif an ti a, he hmunah hian an mosque pawimawh al-Aqsa mosque pawh a awm a ni.

Jerusalem-a Israel leh Palestinian inkara buaina chhuak chungchang ngaihtuahin vawiin hian United Nations Security Council chuan urgent meeting an nei dawn a, buaina chinfel a nih theih dan turte an ngaihtuah ang. Meeting hi Sweden, France leh Egypt-te’n an ngen anga koh a ni.