Venezuela-ah eptuten nawrh huaihawt leh dawn

Venezuela-a eptu pawlte chuan President Nicolas Maduro-a duh lohna lantirin ram pum huap, ni hnih awh nawrh huaihawt leh an tum.

Kar kalta Inrinni khan eptu ṭang­rual chuan kar khat awh nawrh an huaihawt a, tunkar Nilaini leh Ninga­ni hian an huaihawt chhunzawm leh dawn a ni. President Maduro-a’n ram danpui siamṭhat a tum duh lohna lantirin vawiin leh Zirtawpni hian kawngzawh huaihawt a ni bawk ang.

Inrinni-a nawrh huaihawtte hian Maduro-a kaihhruai sorkar thlawptu, Supreme Court building lam panin kawng an zawh a, security force-te chuan lo dangin an intibuai zui a ni. Nawrh huaihawt zinga mi eng emaw zatin hliam an tuar a, an zingah hian musician Wuilly Arteaga pawh a tel. Kum 23 mi musician hi security-te hmaah violin hmnga an hnam hla a tum avangin hriat a hlawh phah hle.

Hetih lai hian Inrinni vek khan sorkar lam thlawptute pawhin Caracas-ah kawng an zawh ve bawk a, President-in ram danpui siamṭha tu tur Constituent Assembly candidate atana a rawtte chuan danpui siam-ṭhat chu an rama boruak muanawm a awm theihna tura tihtur awmchhun niin an sawi.