Duterte-a’n martial law pawtsei

Philippine President Rodrigo Duterte chuan Mindanao thliarkara martial law hman mek chu pawhsei a duh thu a sawi hnuah, kar kalta Inrinni khan December 31 thleng atan pawhsei a nih thu a puang.

Helho leh sipaite inbeihna avangin kumin May 23 khan Mindanao thliarkarah hian sipai thuneihna sang pekna, martial law hi puan a ni. A tirah ni 60 atan he dan hi hman a nih thu puan a ni a, Inrinni kha a tawp hun tur a ni a, mahse kumin chhung atan pawhsei chhunzawm a ni leh ta zawk a ni.

President Duterte chuan helho nuai chimih an nih theih nan martial law hi hman chhunzawm a la ngai tih a sawi a, eptute lam erawh chuan President-in thuneihna zau zawk neih a tumna mai niin an puh thung. Martial law chu thliarkar pumah niloin, helho leh sipaite inbeihna Marawi city-ah chauh puan an duh thu an sawi bawk. Mindanao-ah hian inlakhran duh Muslim helpawl eng emaw zat an awm a ni.

Martial law hnuaiah hian sipaite chuan an mi rinhlelh zawngte chu thubuai siamsak kher loin hun rei tak an hreng thei dawn a ni. President Duterte chuan a ṭul a nih chuan martial law hi ram pumah pawh puan a ni ang tiin alo sawi tawh a ni.

Helho leh sipaite inbeihna, Marawi khawpuiah hian mi 200,000 vel an cheng a, an zinga tam tak chu himna zawngin an tlanchhe tawh a ni. Khawpuia la tangkhangte chuan ei tur leh tui thianghlim an tlachham ṭan tawh nia sawi a ni bawk. Marawi-a inbeihnaah hian hel 420, sipai 100 leh civil mi 45 an thi tawh a ni.