Jordan-a Israel embassy-ah inkap

Jordan khawpui, Amman-a Israel embassy-ah Pathianni khan inkahna a thleng a, Jordan mi pahnih thiin Israel mi pakhatin hliam a tuar bawk.

Israel foreign mi­nistry chuan Jordan mi, hnathawktu pahnihte chu furniture siamṭha turin embassy compound chhungah an lut a, an zinga pakhat chuan security guard chu screwdriver nen a bei ta mai niin a sawi. Security guard hian silaia kap letin, hnathawktu zinga pakhat leh building neitu Jordan mite chu an thi a ni. Security guard pakhatin hliam a tuar bawk a ni.

Pawikhawihna thlen hnu hian building hi khar nghal a ni a, staff-te chu hruaichhuah nghal an ni bawk.

Hetih lai hian Jerusalem-a al-Aqsa mosque awmna, Temple Mount-a Israel-in venhimna tihkhauhna kawng khat atana gate-a metal detector a dah chu Muslim-te’n duh lohin lungawi lohna an lantir a, hei vang hian Israel leh Palestinian inkar­ah pawh buaina nasa tak a chhuah phah a ni.

Israel leh Palestinian-te inkara buaina kal zelah Israel sipaiten Pathianni khan West Bank-a Hamas hruaitu leh activist ṭhenkhat an man. An man zingah hian Hamas kaihhruai sorkara Finance Minister leh MP Omar Abdel Razaq pawh a tel. Hamas activist-te hi Hebron, Nablus, Jenin, Qalqiliya leh Ramallah khua aṭang tein man an ni.

Jordan pawhin Temple Mount-a metal detector dah hi a sawisel a, Jordan mi tam tak chuan Israel thiltih danah an lungawi lohna hi an lo lantir bawk. Jordan ram mipui zinga tam tak chu Palestinian origin an ni. Jordan Police-te chuan Pathianni-a Israel embassy-a inkahna thleng avang hian venhimna tikhauhin, emmbassy-ah hian anti-terrorim force eng emaw zat dahbelh an nih thu an sawi. Police-te chuan thuchhuah siamin, he thil thleng hi an chhui chiang mek tih an sawi bawk.