Kabul-a car bom puakah mi 35 an thi

Afghanistan khawpui, Kabul-ah nimin zing dar 7 vel khan car bomb a puak a, mi 35 an thi a, mi dang 42-in hilam an tuar.

Interior ministry thupuangtu, Najid Danish chuan car bomb hian ministry of mines thawktute chuanna bus a fuh niin a sawi. Police-te chuan bomb puahna hmun hi an khar nghal a, pawikhawihna thlenna hmun hi deputy government Chief Executive Mohammad Mohaqiq chenna-in bul, Shizite Hazar hnam ho chenna bial a ni. Ministry chuan hliam tuar zingah dinhmun ṭha lo tak tak an awm a, thi zat pawh hi an la punchhoh theih thu a sawi.

Taliban firfiak pawl chuan bomb tipuaktu an nih thu hi an sawi. Taliban thupuangtu Zahibullah Mujahid chuan an pawm bomb tihpuahna hmun hi thla hnih vel zet an lo enthla tawh niin a sawi bawk. Bomb puak hian civil mite motor pathum bakah dawr 15 a tichhe tel a ni.

Kabul-ah hian thihchilh bomb tihpuah leh firfiakte pawikhawihna dang a thleng fo a, UN report-in a tarlan danin kumin kum chanve chhunga Afghan civil mi thi zinga hmun ngaa ṭhena hmun khat chu bomb puak leh pawikhawihna dang vanga thi an ni.

UN Assistance Mission in Afghanistan (UNAMA) chuan kum chanve chhungin civil mi 1,662 thah an ni tawh a, mi 3,500 chuangin hliam an tuar bawk niin a sawi. UNAMA hian kum 2009 aṭang khan pawikhawihna thleng avanga civil mite thihna thleng chungchang a lo zirchiang tawh a ni.