Ram 98-ah Covid-19 kai an la pung zel

Khawvela  hripui leng mek, Covid-19 kai chu an la pun belh zel. Coronavirus hmuh chhuah a nih ṭan aṭanga thla sarih hnuah pawh ram 98-ah chuan hri kai hi an la pung zel a, nimin thleng khan mi maktaduai 14.5 chuangin hri hi an kai tawh a ni. He hri vanga thi hi 6,04,232​ an tling tawh bawk. 

Ram hrang hrang zingah US chu hri kai tamna ber leh, hripui thihpui tamna ber ram a la ni chhunzawm zel. US-ah hian hri leng hian ziaawm lam a la pan lo a, a bikin an ram chhim lam state-ahte chuan hri kai hi an la pung chak hle. US dawtah Brazil, India, Russia, South Africa, Peru, Mexico leh Chile te chu hri kai tam zualna ram an la ni chhunzawm zel bawk a ni. 

Hrileng darh zel tur venna atan ram hrang hrangten inkharkhipna leh khuahkhirhna te an kalpui a, Europe ram tam zawk erawh chuan an rama hri lengin ziaawm lam a pan ṭan avangin khuahkhirhna an thlahdul ṭan a ni. Hetih lai hian North America leh Africa lamah chuan a la hluar chho mek thung. 

Khawvelin a buaipui mek, Covid-19 damdawi hi a la awm lo a, hei vang hian ram leh company hrang hrangte chuan vaccine siam chhuah tumin an bei mek a ni. Vaccine enchhin mek hi 130 chuang a awm. 

United Kingdom (UK) sorkar chuan damdawi siamtu, Pfizer Inc., BioNTech SE leh Valneva SE hnen aṭangin vaccine dose maktaduai 90 leina tur inremna a ziak. Sorkar chuan heng vaccine pathumte hi enchhinna, clinical trial neihna tur programme siamin, volunteer 5,00,000 a zawng a ni. 

Pfizer leh BioNTech chuan kumin chhungin vaccine dose maktaduai 30 supply hman an tum tih an sawi a, October thla velah phalna hmuh hman beiseiin,  kuminah chuan dose maktaduai 100 siam hman an tum tih an sawi. Valneva SE pawhin dose  maktaduai 60 pek a remti bawk. 

Gilead Sciences, Hong Kong unit chuan Covid-19 kaite enkawlna atana Veklury (remdesivir) hman phalna chu Pharmacy and Poisons Committee-in a pe tih a sawi. Company hian clinical studies neih meka remdesivir him tawk leh ṭhat dan, data a lakkhawm chu Hong Kong Drug Office of Department of Health-ah a thehlut ang. 

Imperial College London chuan Covid-19 vaccine, COVACI clinical trial a neih chu a thawh hnihna a kalpui dawn. Clinical trial thawh khatna hi volunteer 15-ah neih niin, a hlawhtling nia sawi a ni. Enchinna thawh hnuhnung ber hi volunteer 105, kum 18-75 inkarah neih a ni ang. 

All India Institute of Medical Sciences (AIIMS) Ethics Committee  chuan Bharat Biotech-in Indian Council of Medical Research (ICMR) leh National Institute of Virology (NIV) thawhpuia Covid-19 vaccine a siam, Covaxin chu clinical trial neih phalna a pe. Mihringa vaccine enchhinna hi nimin aṭang khan hmun 12 ah neih ṭan a ni. 

Japan-a hmunpui nei, Fujifilm chuan antiviral drug, Avigan chu Kuwait-ah mihringah enchhinna buatsaih a tum. Clinical trial hi India-a Dr Reddy's Laboratories nen thawkdunin buatsaih an tum a, he damdawi hi coronavirus damdawi atan a ṭha em tih mi 1,000 velah an enchhin dawn a ni.