Israel-in Temple Mount-a metal detector dah titawp

Israel sorkar chuan al-Aqsa mosque awmna, Temple Mount compound luhna tura metal detector a dah chu Muslim-te’n nasa taka duh lohna an lantir hnuah a titawp a, metal detector hi advance surveillance camera-in a thlak.

Prime Minister Benjamin Netanyahu-a kaihhruai cabinet chuan Thawhṭanni khan metal detector dah chungchang ngaihtuahin a ṭum hnihna atan meeting an nei leh a, hun rei tak an sawiho hnuah metal detector hi thlak an rel ta a ni.

Hetih lai hian al-Aqsa mosque director, Sheikh Najeh Bakirat chuan Israel cabinet chuan security camera dah chhunzawm an la tum avangin an thil phut ang chu tihhlawhtlin a la ni lo tih a sawi. Al-Aqsa official, Sheikh Raed Saleh pawhin Palestinian-te chuan hei hi an pawm thei dawn lo tih sawiin, July 14 hnu lamah compound-a thil dah belh reng reng chu lak thlak leh vek an phut tih a sawi.

Temple Mount compound luhna-a metal detector dah hi Muslim-te chuan an duh lo hle a, kar kalta Zirtawpni pawh khan mosque-a

ṭawngṭai rualna hun hmang duh loin, compound pawn lamah hian an hmang thung a ni. Metal detector dah duh lohna lantira Muslim nawrh huaihawtte leh Israel security force-te inkarah pawh buaina nasa tak a chhuak bawk a ni. Buaina chhuak kaihhnawihah hian Palestinian mi panga an thi tawh a, mi 100 chuangin hliam an tuar bawk. Israel civil mi pathum vihhlum an ni tawh bawk.

Nimin khan metal detector dah chu lak thlak a ni a, mahse Palestinian mi tam tak chuan security camera dah tum chu duh lohna an lantir chhunzawm a ni. Camera dahna tur cabel phum hna hi bullzoder hmanga thawh nghal a ni bawk.

Cabinet chuan thuchhuah siamin, Temple Mount-a security camera dahna tur hmanrua leina leh, police officer dah belhna tur senso atan shekel maktaduai 100 (dollar maktaduai 28) vel ruahman a nih thu a sawi.

Israel thuneitute chuan Temple Mount-ah hian mi ṭhenkhatte ralthuam an lakluh ṭhin avangin metal detector dah hi a ngai niin an sawi. Mahse Palestinian lam chuan hei hi dodalin, an sakhaw kalphung palzutna leh, Israel-in Temple Mount compound-a thuneihna pumhlum neih a tumna niin an ngai thung.