Sri Lanka-ah dengue vangin mi 300 dawn thi

Sri Lanka ramah thosi aṭanga inkaichhawn theih, dengue hri leng avangin mi 300 dawn an thi tawh a, hri leng hi a la darh zel rin a ni bawk.

Sri Lanka Red Cross Soceity leh International Federation of Red Cross and Red Crescent Societies-te chuan Sri Lanka-ah hian dengue hri vei hi mi nuai khat an tling tawh niin an sawi a, a rang thei anga puih an ngai tih an sawi bawk.

Red Cross/Red Crescent chuan thu­chhuah siamin, damdawi-in hrang hrangte chu dengue vei an tam avangin an khat hle tih an sawi a, a bikin an ram khawthlang lam bialah hri vei hi an tam zual niin a tarlang. Red Cross chuan hri leng mek venna tur leh, a veitu enkawlna tura a budget siam pawh dollar nuai thumah a tipung tih a sawi.

Health Ministry chuan kumin kumtir aṭang khan dengue hri vei hi mi nuai khat an tling tawh a, mi 296-in an thipui tawh tih an sawi bawk. Dengue vei hriatchhuah zinga a zahve dawn hi khawthlang lam biala cheng an ni.

World Health Organization (WHO)-in a tarlan danin dengue hi khawvela hri leng darh chak ber zinga mi a ni a, ram 100-ah he hri hi darh tawhin, kumtinin mi maktaduai 390 velin an vei a ni.