Canada-in China hnen aṭanga an thil lei ennawn dawn

Canada foreign minister Francois-Phillipe Champagne chuan Global Affairs Canada (GAC) kaltlanga an ramin China siam X-ray scanning equipment leh software system a lei tum, US dollar maktaduai 6.8 man hu chu ennawn a nih dawn thu a sawi.

An thil lei tum ennawn an tum chhan hi an thil leina tur company hi Chinese Communist Party nen inzawm rukna an nei nia rinhlelh vang a ni. China aṭanga an thil lei tum hi Canada consulate, high commission leh embassy 170-te security lama tihchantlunna tura tih a ni. Heng security equipment hi China sorkar ta Nuctech company siam a ni a, he company hi Chinese Communist Party-a general secretary hlui Hu Jintao din a ni. He company hi Asia, Africa leh Europe-ahte soft loan an pek chungchangah thil dik tawk lo a awm niin sawisel an lo tawk tawh a ni. 

Champagne chuan GAC official-te chu an thil lei tumah fimkhur turin leh an thil lei tum chu ennawn leh phawt turin a hriattir a ni. "Nuctech hnen aṭanga kan thil lei tuma thil fel lo a awm a nih chuan kan thil lei tum hi GAC chuan a lei lo ang," tiin Champagne chuan a sawi. 

Namibia rama US dollar mtd 55 man hu X-ray scanner chungchanga corruption case-ah khan Nuctech company hi a inrawlh ve niin New York Times chuan a tarlang a, 2008 May thla khan Namibian prosecutor-te chuan kha corruption-a an man mi pathumte chuan Nuctech an puih vangin US dollar mtd 12.8 an lo la tawh niin an tarlang.