UAE-in Mars-ah Hope Mars Mission kap
United Arab Emirates (UAE) chuan Mars (Sikeisen)-ah a vawi khatna atan Japan-a Tanegashima Space Centre aṭangin nimin zing dar 1:58 khan spacecraft, 'Hope Mars Mission' tih chu a kap chhuak.
He spacecraft hi Mars thleng turin ni 200 chhung hun a hman a ngai dawn a, kilometre maktaduai 493-a thui a zin dawn a ni. A tih ber tur chu Red Planet-a atmosphere zirchian a ni dawn tih UAE Space Agency chuan a tarlang. Mars orbit hi nakkum first quarter velah a thlen beisei a ni a, he spacecraft hi nakkuma UAE-in independence day vawi 50-na a thlen tur champha puala a kahchhuah a ni.
A zin hun chhung tur hi thla sarih vel a ni dawn a, Mars-ah hian kum khat hi ni 687 a ni a, chu chu Martian year an ti. Hemi hun chung hian he spacecraft hian Mars-a boruak awm dan a zirchiang dawn a, Mars-a vaivut te chu leia vaivut nen a danglam dan te hriat a nih theih nan a zir chiang bawk ang. Hope hi kum tluana Mars leilung leh boruak inthlak chhoh dan zirchiangtu hmasa ber a ni thei dawn a ni.
Mars leilung awm dan pawh chiang zawk leh ṭha zawka hriatfiah a nih theih nan thalak pawh chiang zawkin spacecraft hian a lak theih beisei a ni. Mars-a atmosphere (Martian atmosphere) upper leh lower layer-te avanga Mars-a leilung lo chhiat dan te chu a zir dawn a ni. Hmanlai huna Mars-a sik leh sa awm dan leh tuna a lo danglamna lai hriat tumin spacecraft hian a zirchiang dawn bawk.
Kum tluklehdingawn 3.5 liam taah khan Mars-ah hian tui a awm niin mithiamte chuan an sawi a, orbit thlalak aṭanga a lan dan chuan Mars-ah hian lui luanna leh tuipui awmna hnuhma te pawh hmuh a ni. A leilungah hian water-soaked rock (luia lung ang chi) a awmna pawh hmuh a lo ni tawh bawk. Hengte avang hian mihring an chen theih mial takin tiin khawvela mithiam tam takte chuan Mars awm dan phung zirchianna hi an lo neih phah fo tawh reng a ni.
Van thengrenga zinna spacecraft "Hope Mars Mission" hi kum 2014 khan UAE president Khalifa bin Zayed Al Nahyan chuan an rama science lama hmasawnna tura hmalakna tur a puan zinga a lian ber a ni. He mission hi a hlawhtling chuan UAE hi Arab ram zinga Mars-a inkapkai thei hmasa ber a ni ang.