Malaysia Court-in PM hlui ngenna a hnawlsak hnuah tan-inah khung

Malaysia prime minister hlui Najib Razak-a'n state fund, 1MDB eirua puhnaa thiam loh chantir a nih chungchanga a appeal-na chu ram chhunga court sang ber, Federal Court chuan a hnawlsak.

High Court-in hremna a lo pek tawh ngaihtuah ṭha leh tura Najib ngenna hi Federal Court-in a hnawlsak hnuah, Thawhlehni khan Najib hi Kuala Lumpur khaw daia Kajang tan-inah dah nghal a ni.

Kum 69 mi, Najib hi a thubuaiah hian kum 12 tang tura hremna pek a lo ni tawh a, Malaysia prime minister hlui zinga tanina khung hmasak ber a ni.

Eptu hruaitu, activist leh mipui tam tak chuan court-in thutlukna rang taka an siam nghal thei chu an fak hle a, Malaysia mipuite'n kum 2018-a Najib kaihhruai sorkar paihthla tur leh a lakah rorelna dik kengkawh tura an ngenna chu a hlawhtling ta tih an sawi.

Member panga awmna, Federal Court panel chuan High Court thutlukna hi thutlukna dik tia sawiin, Najib ṭanchhan chu belhchian dawl lo ni a an ngaih thu an sawi ve bawk.

"He thubuai hi thuneihna hmansual leh pawisa tihchingpenna thubuai hriatthiam awlsam tak a ni," tiin chief justice Maimun Tuan Mat chuan court thutlukna a puanaah a sawi a ni.

Court hian a thubuai tihkhawtlai a nih avanga kum 2020 aṭanga bail-a chhuah lailawk, Najib chu taninah a hun hmang ṭan turin thupek a tichhuak nghal a. Pawisa USD mtd 47 chawi turin a ti bawk.

1MDB hi kum 2009-a thuneihna a chan hnua Najib-a'n development fund a din a ni a, mahse he fund aṭang USD tld 4.5 vel chu Najib-a thurualpuiten an ruchhuak niin investigator-te chuan an sawi. Najib hi kum 2020 khan 1MBD unit hlui, SRC international aṭangin dan loa USD mtd 9.4 dawng leh, a thuneihna dik lo taka hmanga puh chungchangah thiam loh chantir a ni.