Bangladesh-in kawlphetha renchem nan school leh office kal hun titawi

Bangladesh sorkar chuan kawlphetha lama indaih lohna an tawh mek avangin kar khata school chawlh hun ni khat a siam belh a, sorkar office leh bank-te pawh an hnathawh darkar a tihtlem sak bawk. Hei hi nimin aṭang khan an hmang ṭan nghal a ni.

Ukraine indona nghawng leh fuel man sang zel avangin Bangladesh hian kawlphetha renchemna turin hma a la a ni.

Bangladesh-ah hian school hi Zirtawpniah an chawl ṭhin a, mahse sorkar chuan nimin aṭang khan Inrinni a chawlh tel tir tih cabinet secretary Khander Anwarul Islam chuan a sawi.

Sorkar office leh bank-ah pawh kawlphetha renchemna atan ni khata an hnathawh hun, darkar riat ni ṭhin chu darkar sarihah tihtawi sak an ni bawk. Private office-te erawh chu anmahnia ruahmanna siam turin tih an ni.

Bangladesh hian tunhnai khan an foreign currency reserve tlahniam mek khaichhuahna turin ruahmanna thar an siam a, thla hmasa khan, fuel man chu 50% chuangin an tipung tawh a ni. Sorkar chuan Russia aṭangin man tlawm zawka fuel lakluh dan an dap mek tih a sawi bawk.

He thutlukna hian sawisel a hlawh nghal hle a, sorkar chuan khawvel puma fuel man sang ngaihtuah chungin he hmalakna hi an kaltlangpui a ṭul tih an sawi. Thil man sang avang hian khawlaiah lungawi lohna tenau lantir tawk an awm chho reng a, sorkar chuan tualchhunga fuel man chu international price a zir zelin an her danglam dawn tih a sawi.

Sorkar chuan diesel hmang power plant-te a tihtawp vangin nitina kawlphetha siamchhuah megawatt 1,000 in a tlahniam a, hei vang hian power cut a thleng zing tawh hle.