Chile sorkarin hnathawh hun tihtlem tum

Chile president Gabriel Boric chuan Thawhlehni khan an rama hnathawh hun chhung tihtlemna tur bill tharthawh lehin, a campaign laia a thutiamte tihhlawhtlin ngei tumin hma a la tih an sawi.

He bill-ah karkhata hnathawh hun darkar 45 ni ṭhin chu darkar 40-ah tihtlem tum a ni. Kum 2017 khan Congress-ah pharh ni tawh mah se ngaihtuah lohin a la tang a ni.

President Boric chuan bill hi hmanhmawh taka ngaihtuah thar leh a ngai tih Thawhlehnia Presidential Palace-a thu a sawinaah a sawilang. He bill-a special caterogy hnuaia awmte tana hnathawh darkar tihtlem rawtna hi lawmaker-te chuan an sawiho dawn a, President chuan vote lak a, pawm thuai a nih a beisei thu a sawi. "Heng insiamṭhatnate hian Chile hmel thar, dik leh thianghlim zawk min neihtir thei dawn a ni," a ti.