King Salman damdawi-inah dah lut

Saudi Arabia lal kum 84 mi Salman bin Abdulaziz Al Saud chu an ram khawpui Riyadh-a damdawi-inah mit vung vangin nimin khan dah luh a ni.

Kum 2015 January 23 aṭanga Saudi Arabia roreltu, King Salman hi damdawi-inah a inen tir thu media-te chuan an tarlang a, chanchin kimchang erawh an tarlang lo thung. Salman hi Saudi royal family hotu ber a nih bakah an ram sorkar hotu a ni bawk. Lal a nih hma hian kum 50 chuang chu an khawpui Riyadh governor a lo ni tawh a, kum 2 leh a chanve chu Saudi crown prince leh deputy premier a lo ni tawh bawk. 

Iraq prime minister Mustafa al-Kadhimi chuan King Salman dam loh vang hian Riyadh a tlawh tur chu a sawn hla. 

Prince Faisal bin Farhan Al Saud chuan an rama Mustafa lo zin a tum chungchanga chu sawn hlat a nih thu a sawi a, Iraq chu an ram ṭhianṭha tak a nih thu a sawi bawk a ni. Kum lama upa tawh tak Salman dawta lal tur chu a fapa, kum 34 mi crown prince Mohammed bin Salman a ni. Ani nihna dinhmun hi a pa  tih lohah chuan a sang ber a ni. Crown prince hian an rama inkhuahkhirhna khirh tak takte a thlahdul chho a, hmeichhia dikna chanvo ṭha zawk pawh siamsakin an ram ṭhalai zingah pawh a lar hle a ni.