France-ah ram kang avangin mi 10,000 sawnchhuak
France-ah ramkang avangin mi 10,000 chu hmun him lamah sawnchhuah an ni.
France chhim lam, Provence-Alpes-Côte d’Azur biala ramngaw chu nasa takin a kang a, ram hectare 3,000 vela zau a kang tawh a ni. Thawhlehni khan ram kang ṭhelh hna hi kangṭhelhtu leh sipai 4,000 velin an thawk a, water bomber 19 tirh an ni bawk. Kang ṭhelhnaah hian kangṭhelhtu 12-in hliam an tuar tawh a, police officer 15 pawh meikhu an hip luh nasat avangin enkawl an ngai bawk. Thli na tak a tleh tel avang leh, khua a ro em avangin kangmei chhuak hi a darh chak hle a, France sorkar chuan European Union hnenah pawh kang ṭhelhna atan thlawhtheihna pahnih tir turin a ngen a, Italy chuan thlawhtheihna hi a tir nghal a ni.
Thla hmasa lama ram kang nasa tak lo tuar tawh, Portugal ramah pawh Pathianni khan ram a kang thar leh a, ram kanna bula thingtlang khaw 10-a chengte chu hmun him lamah sawnchhuah an ni.