Israel-in al-Aqsa-a security dah titawp

Muslim-te’n lungawi lohna an lantir chhunzawm zel avangin Israel chuan al-Aqsa moque awmna, Temple Mount-a security camera a dahte chu a la thla leh.

July 14 khan Temple Mount compound hi Pa­lestinian mi pathumten beiin, Israel security guard pahnih an kaphlum a, he pawikhawihna thleng avang hian Israel chuan venhimna tihkhauhin temple luhna gate-ah metal detector a dah nghal a ni. Muslim-te’n metal detector dah hi nasa taka sawiselin, al-Asqa mosque-ah pawh Zirtawpnia ṭawngṭaina hun hman ṭhin chu hmang duh loin compound pawn kawtthlerah an ṭawngṭai rual a ni. Nasa taka an dodal avang leh, lungawi lohna an lantir chhunzawm zel avangin Israel chuan metal detector hi la thlain, Thawhlehni khan security camera a dah ta zawk a ni.

Security camera dah pawh hi Muslim-te chuan duhloin, July 14 hma lama a awm dan pangngai anga dah leh duhin lungawi lohna an lantir chhunzawm zel a ni. Israel-in Temple Mount compound-a venhimna lam thil a dah chu compound chunga dan kalha a thuneihna lantir a tumna niin an ngai. Nimin khan Temple Mount compound-a security camera dahte chu lakthlak a ni leh ta a, lakthlak a nih lai hian a bul­ah Palestinian mi eng emaw zat an pungkhawm a, hnehna an chang ta niin a sawi.

Al-Aqsa mosque chung­changa buaina chhuak avang hian Palestinian mi paruk an thi tawh a, Israel civil mi pathum an thi tel bawk. Israel security force nena an intihbuaina lamah mi tam takin hliam an tuar bawk a ni.