Ukraine Independence Day-ah Russia-in missile hmangin bei

Ukraine Independence Day, Nilaini khan Russia chuan missile hmangin Ukraine khawchhak lam a bei leh a, civil mi 22 an thi.

Ukraine President Volodymyr Zelenskyy chuan Soviet thuneihna aṭanga Ukraine-in zalenna a chan champha, Independence Day vawi 31-naah hian Russia chuan rawng taka chetlakna an neih leh ngei a rin thu a lo sawi lawk tawh a, hei vang hian an ram khawpui Kyiv-ah chuan a lawmna buatsaiha mipui punkhawmte pawh an lo khap a ni. US pawhin an mi leh sate chu Ukraine chhuahsan turin a lo chah bawk.

Nilaini khan Russia hian Ukraine khawchhak lam, Russia-in a luah mek Donetsk khawthlang lam km 145 vela hla, Chaplyne khua khualzin phur rel chu rocket-in a kap niin United Nations Security Council meeting-a video kaltlanga thu a sawinaah President Zelenskyy chuan a sawi. An hriat theih chinah Russia-in a beihnaah hian civil mi 22 an thi a, thi zat hi an la pun theih thu a sawi bawk. Pawikhawihna thleng zawng zawngah Russia chu mawhphurtu pumhlum a ni tih a sawi bawk.

Zelenskyy thachhangdawltu, Kyrylo Tymoshenko pawhin Russia sipaite hian Chaplyne khua chu ṭum hnih an kah thu a sawi. Missile pakhat zawk hian mipa naupang awmna in a fuh avangin he naupang hi a thi nghal a, missile pahnihna hian railway station kapfuh lehin khualzin phur rel a kang a, rel kangah hian mi 21 an thih belh leh a, midang 31 an hliam bawk a ni, a ti.

Russia defence ministry chuan hemi chungchanga zawhna te chu an la chhang lo a, Russia chuan civil mi an bitum loh thu an sawi thung.

"Russia-in missile hmanga civil mi tamna Ukraine rel station a kap mai hi rawng taka an chet duhzia lantirna a ni. Khawvel ramdanga kan thawhpuite nen Ukraine tan kan thawkho zel dawn a, he pawikhawina thlengah hian Russia official-te chuan mawh an phur ngei ang, " tiin US secretary of state Antony Blinken chuan a sawi.