Sri Lanka-in Consumer Goods Item 300 lakluh khap

Sum indaih lohna avanga talbuai mek, Sri Lanka sorkar chuan tiam chin awm loin ram dang aṭanga consumer item 300 lakluh a khap.

Sri Lanka hian kum 1948-a Britain lakah zalenna an chan hnua economy lama an tlakhniam ber ṭum an tawng mek a ni. Sum lam an talbuaina hian ram chhunga nitin mamawh indaih lohna thlengin a thlen phah a, kumin kumtir lam aṭang khan an harsatna tawhah sorkar chu mawhphurtuah puhin mipuiten nawrh an huaihwt fo a ni. Mipuite nawrna avangin thla hmasa khan Gotabaya Rajapaksa kaihhruai sorkar pawh paihthlak a lo ni tawh a ni.

Consumer Goods lakluh khap chungchangah Sri Lanka finance ministry-in special notification tichhuakin, khap zingah hian chocolate, perfume, wristwatch, telephone, pressure cooker, air conditioner, musical instrument, alcoholic leh non-alcoholic beverage bakah product tam tak lakluh an khap.

Khapna thupek hi August 23 aṭang khan an hman ṭan nghal a, mahse August 23 hmaa ram dang aṭanga an rawn thawnchhuah hmante erawh chu a huam tel lo a, heng an rawn thawn hmante hi September 14 thleng ngaihnathiam an ni ang.