Thailand Court-in PM Prayut a hna aṭangin chawlh lailawk tir

Thailand-a Constitutional Court chuan Nilaini khan prime minister Prayut Chan-O-Cha chu PM a nihna aṭangin a chawlh lailawk tir.

Eptute chuan Prayut hian PM term, kum riat a hmang zo tawh nia sawiin court-ah petition an thehlut a, court chuan an thu thlen hi pawmin, Prayut chu a chungthu ngaihtuah fel a nih hma chu PM anga hna thawk zui tawh lo turin a ti a, ni 15 chhungin a laka case thehlut hi chhang turin a ti bawk.

Prime Minister a nihna aṭangin chawlh tir lailawk ni mah se, Prayut hian defence ministry a chan tel avangin Defence Minsiter ang erawh chuan a thawk zui thei dawn tho a ni.

Prayut-a deputy leh army chief hlui, Prawit Wongsuwan chu thubuai ngaihtuah a nih chhung chu caretaker prime minister atana ruat a ni nghal bawk.

Deputy prime minister Wissanu Krea-ngam chuan Prayut hi PM aṭang hian paihthlak a ni lo a, chawh lailawk tir chauh a ni tiin, cabinet chuan dan pangngai angin hna an thawk chhunzawm reng dawn tho tih a sawi.

Eptu pawl, Move Forward Party hotu, Pita Limjaroenrat chu petition thlawptute zingah hian a tel a, Pita chuan an ramin hruaitu thar an mamawh tawh tih a sawi.

Constitutional Court hi Thailand politics-a a inrawlh ṭum khatna a ni lo a, kum 2006 leh 2014 pawh khan an ram inthlanpui result chu a lo hnawl tawh a ni.

Thailand ram danpui hnuaiah Prime Minister dinhmun hi mi pakhatin kum riat aia rei a chelh khap a ni. Eptute chuan Prayut hian kum 2014 aṭang khan thuneihna hi chelh ṭanin, kum riat a chelh tling tawh tih an sawi.