Japan defence minister a bang
Japan defence minister Tomomi Inada-i chu sipai tirhchhuah chungchanga document thup boa puh a nih avangin a bang. Inada-i hi hmeichhe zinga Japan prime minister dinhmun chelh thei hmasa ber tura beisei a ni ṭhin.
Nimina press conference a neihnaah Inada-i chuan a banna lehkha hi Prime Minister Shinzo Abe hnena a thehluh thu leh, PM pawhin alo pawmsak thu a sawi.
Tomomi Inada-i hi kum 2016, August thla khan defence minister atan hian dah a ni a, kum khat dawn he dinhmun a chelh chhung hian harsatna hrang hrang a hmachhawn hman a ni. Nikum December thlaa sawisel hlawh tak, Tokyo-a Yasukuni war shrine-a ṭawngṭaina avang khan ramchhung leh rampawn lamah pawh sawisel a tawk nasa hle. Hei bakah sipaiten an rama rorellai party chu thlawp turin mipuite an duh nia a sawi avangin sawisel a ni bawk.
Prime Minister Shinzo Abe chuan a minister-in banna a thehlut chu pawi a tih thu a sawi a, ram mipuite hnenah ngaihdam a dil nghal bawk. Foreign Minister Fumio Kishida chu defence ministry hmui rih tura ruat a nih thu a sawi.