Venezuela-in nawrh huaihawt a khap

Venezuela sorkar chuan Constituent Assembly thlan tur chungchanga dodalna lantir zawnga nawrh huaihawt a khap.

Interior Minister Nestor Reverol chuan Caracas-a press conference a neihah hei hi a sawi a, rampumah vote lak tur tibuai zawnga lungawi lohna lantir hi khap a nih thu a sawi a, dan bawhchhiate chu kum 5-10 thleng tantir theih an nih tur thu a sawi.

Sorkar laipuiin ram danpui siamṭha tura thuneitu sang a din, Constituent Assembly member tur thlan an ni dawn a, mahse eptu lam chuan Constituent Assembly din hi duh loin hei hi President Nicolas Maduro-a’n thuneihna pumhmawm a tumna hmanrua nia sawiin, vawi tam tak lungawi lohna an lo lantir tawh a ni. Ram mipui ngaihdan lakah Venezuela mipui 70% velin Constituent Assembly din hi an duh lo a ni.

Eptu hruaitute chuan sorkar­in nawrh huaihawt khapna thupek hi tichhuak mah se, hei hian eptuten nawrh huaihawt tum a dan phah an rin loh thu an sawi. Eptute chuan Caracas-ah chauh ni lo, ramchhung hmun hrang hrangah lungawi lohna lantir an tum thu an sawi.

Hetih lai hian eptute nawrh huaihawt avang hian hun rei tak ramchhung politics a buai tawh a, President Maduro chuan buaina chinfel dan kawng zawnga eptute nena inbiakna neih a duh thu a sawi bawk.