Pakistan PM thar atan Shehbaz Sharif-a ruat

Pakistan-a rorellai party, Muslim League-Nawaz (PML-N) chuan Prime Minister aṭanga bang ta, Nawaz Sharif-a thlak turin a nau, Punjab province chief minister Shehbaz Sharif-a a ruat.

Kar kalta Inrinni khan PML-N parliament member-te’n meeting neiin PM thar tur hi an ngaihtuah a, meeting zawh hnuah an thutlukna siam hi PM hlui Nawaz Sharif-a chuan a puang a ni. Parliament lower house, National Assembly-in PM atana Shehbaz Sharif-a rawtna hi a pawm hma chuan PM dinhmun lo chelh lailawk turin Petroleum Minister hlui Shahid Khaqan Abbasi chu ruat nghal a ni bawk.

President Mamnoon Hussain chuan hriattirna tichhuakin, Thawhlehni tlai dar 3-ah National Assembly-ah prime minister thar thlan a ni dawn tih a sawi. National Assembly Secretariat pawhin prime minister thar thlanna tur atan hian a hranin hriattirna a siam bawk. Nomination paper hi vawiin chawhnu dar 2 thleng thehluh theih a ni ang.

Rorellai PML-N chuan PM candidate atan hian Shahid Khaqan Abbasi hi a ruat tawh a, a ni hian NA member atana Shehbaz Sharif-a thlan a nih hunah a hmun hi a kian leh nghal dawn a ni.

Pakistan ram danah chuan prime minister hi National Assembly member a ni tur a ni. Shehbaz Sharif-a hi NA member a ni lo a, hei vang hian Parliament-in PM atan a pawm hmain NA member atan thlan tlin hmasak phawt a ngai dawn tihna a ni.

PM thar atana ruat, kum 65 mi Shehbaz Sharif-a hi kar kalta Zirtawpni-a Pakistan Supreme Court-in eiruk thubuai avanga PM aṭanga a ban, Nawaz Sharif-a nau a ni. Shehbaz Sharif-a hi rorel thiam tak, sipai te nen pawha inpawhna ṭha tak nei nia sawi a ni. Supreme Court hian Nawaz Sharif-a hi Panama Paper chungchangah thubuai a siamsakin, thiam loh a chantir a, PM a nihna pawh a diqualify sak nghal a ni. Hemi hnu hian Sharif-a pawhin banna a thehluh ve ngha a ni.

Panama Paper putru-ah hian Nawaz Sharif-a hian a thil neih zata a tarlan zinga tel lo, ram pawn lamah a fate hminga company leh apartment-te neihah tarlan a ni a, hei vang hian eiruk thubuai siamsak a ni. Sharif-a chuan he thilah hian dan bawhchhiatna a nei lo niin a sawi thung.